Fy enw i yw Molly Fenton, ac rwy’n ymgyrchydd ieuenctid dros iechyd menywod a gweithgarwch gweithredu gan bobl ifanc ledled Cymru.

Rydw i ar fin gwneud fy ail sgwrs Tedx ac mae gen i Fedal Gwobr Dinesydd Prydain am wasanaethau i Ofal Iechyd (BCAh). Fe ddechreuais i fy ymgyrch fy hun ‘Caru Eich Mislif’ yn 16 oed. Chwe blynedd yn ddiweddarach, rydw i wedi gwirfoddoli gyda fy mwrdd iechyd lleol, Bwrdd Iechyd Prifysgol Caerdydd a’r Fro (CAVUHB), Elusen Tiwmor yr Ymennydd fel eu Llysgennad Ifanc cyntaf yng Nghymru a llawer mwy o fudiadau yng Nghymru, yn arwain ac yn cyfrannu at ddadstigmateiddio sgyrsiau iechyd a lledaenu ymwybyddiaeth am fod yn ifanc ac yn sâl.

[Mae dadstigmateiddio yn golygu sicrhau bod rhywbeth yn ddealladwy fel rhan o fywyd a’i wneud yn dderbyniol yn hytrach na rhywbeth sy’n gywilyddus neu’n gudd]

Ar ôl cael diagnosis o diwmor ar yr ymennydd wedi’i ysgogi gan symptomau hormonaidd, roeddwn i eisiau gwneud fy rhan i atal cynifer o bobl ifanc â phosibl rhag teimlo cywilydd wrth siarad am eu cyrff, fel rhywun cyfartal sy’n ‘deall hynny’.

Y newidiadau mwyaf i fi oedd yn fy mislif, felly sefydlwyd ‘Caru Eich Mislif’ i ganolbwyntio ar ddadstigmateiddio mislif, a daeth yn hwb cymunedol enfawr i roi cynhyrchion mislif am ddim. Hyd yn hyn yn 2025, rydym wedi rhoi dros 2000 o gynhyrchion ledled Cymru.

Rwy’n mwynhau’r ystod o waith gwirfoddoli rydw i’n ei wneud gyda llawer o fudiadau, gan gyrraedd llawer o bobl a chael sgyrsiau teimladwy â phobl sydd efallai heb gael lle diogel i rannu pethau o’r blaen.

Rydw i wedi wynebu heriau oherwydd fy oedran, gan weithio gyda rhai mudiadau lle nad wyf wedi teimlo eu bod wedi fy nghroesawu’n llwyr neu gael pobl yn dweud nad wyf i’n gwybod unrhyw beth oherwydd fy oedran, ond gydag amser, rydw i wedi dod o hyd i fudiadau fel CGGC sy’n gwbl gefnogol i wirfoddolwyr ifanc fel fi ac sydd yno i gefnogi!

Rhoddodd gwirfoddoli ddihangfa i mi pan roeddwn i’n ynysig iawn ac yn teimlo’n unig ar ôl fy niagnosis a phan oeddwn i wedi colli llawer o’r bywyd oedd gen i. Fe wnes i ddod o hyd i fy holl ffrindiau trwy wirfoddoli, mae’n fy atgoffa mai person ydw i ac nid fy salwch ac mae wedi fy helpu i wneud pethau bob dydd unwaith eto ac ailymgysylltu fy ymennydd mewn ffyrdd hwyliog, gwerth chweil.

Fy neges i unrhyw un sydd eisiau gwirfoddoli… mae lle i bawb. Dewch o hyd i fudiad sy’n gwneud i chi deimlo’n ddiogel ac sy’n eich gwerthfawrogi, neu ewch amdani eich hun a dechrau eich ymgyrch eich hun fel y gwnes i.

MWY O WYBODAETH: Os hoffech chi wybod am wirfoddoli yng Nghymru, gallwch chi chwilio am gannoedd o gyfleoedd yn www.volunteering-wales.net